كتاب معجم أسر بريدة

الجديعي - أرجوزة الأسرة - ج: 3 - ص: 309

غرن شبابي لين راحن الازمان ... اقبل طريح عند بابك وشايب

غرن وسع حلمك وفاتن الاوان ... مالي جدا غير البكا والنحايب

غرتني الصحة وانا صرت كسلان ... راح العمر مني بليا مكاسب

انا الذي دست الخطايا وعصيان ... واليوم ذليل عند بابك وتايب

ضاع العمر مني بلهو ونقصان ... مالي جدا غير العفو منك طالب

اسئلك يا منشي الهبايب والامزان ... يا عالم بالكون وماكان غايب

ادعوك يا مولاي حنّان منَّان ... ترحم طريح عند بابك وتايب

مالي جدا غير التحسف والاحزان ... فاتتني الرحله وبان التلاعب

وانا قصدتك لا تخلين منهان ... حاشا كرم جودك يخلين سايب

امنن علي بتوبة منك تغشان ... اسعد به لي جا اسود الراس شايب

بيوم تخلَّى عنْ امي والاخوان ... ارحم عبيد عند بابك وهايب

زل العمر مني وانا صرت غرقان ... من الذنوب اللي على القلب ضارب

مالي عذر غير الندامه تقفان ... والخوف يذعني لو اصير خايب

يوم التغابن والفضايح والاهوان ... يوم تفر الوالده والقرايب

يوم طويلٍ شيبوا فيه ورعان ... كلٍّ تبرا من اهيله وهارب

يوم القيامه ما حصل فيه رجعان ... لا تقبل الأعذار ولا فيه تايب

اطلبك تقبل توبتي يا ابالاحسان ... واغفر ذنوبي يا جزيل الوهايب

انت الرحيم ارحم خضوعي والاذعان ... قبل تروح الروح واشوف المصايب

اسئلك ياللي كل ما راد هو كان ... يا من يشوف الما بعوج الرطايب

يا من تصاريف الخلايق والاكوان ... في دبرته ما احد لحكمه مشاغب

اطلبك تغفر لي وتصلح لي الشان ... وتحسن ختامي عند فراق الحبايب

تم الجواب اللي نظمته بقيفان ... والمعذره عن زلة او معايب