كتاب معجم أسر بريدة

المعتق - شعراء من المعتق - ج: 20 - ص: 497

رحنا أو كل قال لما يخلصون ... كل الزبون اللي بالعيادة اقبالي

ثم رجعنا بفكرةٍ له يشيلون ... لم الطبيب بشيّة الرب خالي

قالوا بكس أطول لرجوله يمدون ... قمت اتعذر ما اقدر أسوق بعدالِ

إمحمد العلي يسوقه أو بالهون ... أو خفف هواها ترى الضغط عالي

ترى المطاب تصوب اللي يونون ... أرفق بها يا محمد أسمع مقالي

قاموا أو شالوها بالأيدي يعضدون ... راحوا بها وانا لي الهم جالي

جوا صرفوا له حبوب عيّوا يحدرون ... بالميه ندفعها أو مابه حيالي

رحت أو طلعت إلديرتي دون يدرون ... حاولت أبرقد مير زادت جفالي

جانا النذير بظهر الجمعة يحضرون ... أمك تقول اليوم نادوا إعيالي

الوالده مع الوالد راحوا يزورون ... قالوا لي اقعد صرت واحد لحالي

صرت العصر ما بين سالي ومشطون ... لا أقعد على حيلي وصابن هبالِ

جيت العشاء قالوا رجال يحفرون ... بالمقبره ناسٍ وكاد رجالِ

قلت اسكتوا يمكنْ نُهم به يزورون ... أمواتهم وانا على الكبد صالي

الوالده جت زايره قلت وش لون؟ ... هيا أخبريني في مكان إلحالي

جوا العشا قاموا عليها يذورون ... من التراب اللي من قبره مزالِ

* * * *

يا حر قلبي يوم راحوا يخطون ... وهي تسمع قرعهم بالنعالِ

جانا أبوي ملحِّد وهم يبكون ... والكل منهم يدِّعي بالكمالِ

في ساعته هيضت ما كان مكنون ... أصب ونات غليظه طوالِ

أسباب مابي ياعرب كان تدرون ... فقدي حنونة والدي ذا مجالي

أبكي أو من لامن من الرب ملعون ... عساه بالدنيا فقيد العيالِ

وش به يلوم اللي عليها يبكّون ... ما يدري أنه فقدها سم حالي

هي أم كل المعتق اللي تعرفون ... وهي لهم مثل عظيم الجبالِ

يا ما قعدت تحكي على اللي يحصدون ... لي جا حصاد الزرع ماله مثالِ