كتاب معجم أسر بريدة

باب الدال - الدخيل - ج: 6 - ص: 234

يسيء بسمعتنا لمقصد وتخريب ... يغطي معاييبه بتشويه الابطال

مخالفات أقوام ناس سكاريب ... خجمان رجال ما بهم عز وارزال

بغيت أنا اتركهم وشفت التعاذيب ... وصبري نفد والناس ما ترحم الحال

يقطعك يا دنيا بنا شقت الجيب ... عيال الحمايل ما لهم كار يا رجال

وقتٍ به الثعلب غدا اشجع من الذيب ... وللبومة الخرسا صفي الجو والجال

والله يا لولا اللي كما الشمس ما تغيب ... اللي لهم في عالي المجد منزال

عيال اخو نوره سباع الضواريب ... اللي حموا نجد العذيه للاجيال

إني لشب النار باهل العذاريب ... وإني أقول قولٍ ما بعد قيل ويقال

لساني له حدود سوات المشاذيب ... وادرك عسير القول وابحور الأمثال

مير استعيب العيب وادري المناقيب ... والناس ما ابيهم يقولون وش قال

يا الله يا المعبود يا عالم الغيب ... تدفع شرور الناس عنّا والأهوال

وصلاة ربي عد رمل العراقيب ... على نبي للثقلين مرسال

مما قاله الشاعر دخيِّل بن محمد بن علي الدخيل:

سر يا قلم واكتب من الشعر منظوم ... واكتب على صفح الورق لي مقاله

نصيحةٍ للي به الكبر والزوم ... الناس مواريها الغبا والجهاله

ناسٍ يحقرون الرجاجيل وغشوم ... غرتهم الدنيا وزهرة اظلاله

احذرك حقران الرجاجيل ماشوم ... يرَّث عليك المضيعه والفشاله

تصير مثل اللي عن الدرب منجوم ... زَّل الطريق ولا تصرَّف بحاله

بليلٍ غطا جوه عواصيف وغيوم ... ولا ينعرف وين الجنوب وشماله

يمشي ويبرم لين علَّق به النوم ... وامسى وحيدٍ بالمهالك لحاله

لي صار ما عندك من الدرب معلوم ... وش لك بنفسك تدعي بالكماله

واعرف ترى من كمَّل النفس مذموم ... يدلك على بعض الجهامه خباله

الزود عيب بالرجل يرَّث اللوم ... والكذب نقص ولا توصل حباله

والشعر خلَّه للرجاجيل محشوم ... خله مع اللي هرجهم بالشكاله