كتاب معجم أسر بريدة

باب الدال - الدخيل - ج: 6 - ص: 236

يقول دخيِّل بالبيوت المباكير ... قول حشيم وفايض من حراره

من وسط دولاب قفوله مسامير ... وافتر دولاب الضماير وثاره

مقدار ما ينداس في حبة الشعير ... يا مرحبة بالوصف قدحة شراره

مثل الذهب صغته على حامي الكير ... صوغت صواويغ الذهب للسواره

بيوت عتبات جزال مشاهير ... وزنتها وزن دقيق عياره

وجتني كما وصف البكار المعاشير ... أوردتهن عدٍّ بجمِّه غزاره

وفلِّيت أنا فيهن سواة المغاتير ... اللي رعت عشب السهَّل والزباره

وصورت أنا ربعي على الوضع تصوير ... صورة شرف ماهي حكايا عياره

وعطرتهن بالمسك وريح المزاهير ... لربعي عسى الله لي يطيل بعماره

وادنيت ما يقطع دكاك العثامير ... يوم انطلق ثوَّر وعرجد غباره

ونصيت أنا ربعي قرَوم المناعير ... أهل القصيم اللي بعيدٍ مساره

ودي بهم له به عجاج ومعاصير ... لم النشاما منتوين الزياره

وفي منبت العاذر خيام المظاهير ... ومقناصهم غرب الزبيره يساره

بشامة زرود اللي تحيطه مزابير ... والبتر شرقه والنفود بجواره

بقفرٍ يغلنَّه وساع المناحير ... فيه الحطب والعشب تطرد خضاره

ودي بهم يوم اجذبتنا التفاكير ... وهاضت وراجت بالحشا باستداره

لربعي هل العليا رفاع المصادير ... أهل الدروب الطايله والجساره

صقورهم معهم سواة الطوابير ... عسكر تحرَّى مقررات الاماره

هم ربعي القصمان حمَّاية العير ... الطامة الطمعان عن ذود جاره

يوم رجال الطيب تعطى التقارير ... وكلٍ على قدره يفصِّل وزاره

ما فحطوا بالسوق مثل الهمارير ... وعند البزور وعن خطو السماره

للصيد عطَّاش ومنهم زعاطير ... ولاجل المراجل ما تهاب الخساره

والله فلا به كذب ولا قلت تزوير ... وعندي عليه شهود واثبت قراره

ما يهمهم للصيد بذل المخاسير ... ولاجل المراجل ما تهاب الخساره