كتاب معجم أسر بريدة

الدوسري - الدوسري وعرائس الشعر - ج: 6 - ص: 358

تقول دوِّر لي بكل المعاشيش ... لزْمًا تدوِّر باسفل السوق واعلاه (١)

وقلت: هيا للامهار العريبة ... اللي مضاريبه بْراس السريبه

أبو لْطيف اللي علومه عجيبه ... كم من هنوف عند اهلها تمناه

تقول: نعم به مكيِّف وطربان ... . . . . . . . . .

خله على كيفه والقلب مشتان ... مشتان في بيته هنوف تحراه

وقلت: (ابورشده) لك شف ومراد ... بالمشتري والبيع ماهوب ستاد

ورزقه بالمرجله قام يزداد ... شوفي ودرب المرجله ماتناساه

تقول: ونْعم به عجوبي ومزاج ... . . . . . . . . . .

من شوفتي للشيب في عارضه لاح ... الله يكبر حجته عند مولاه

وقلت هذا (العدل) شيخ الدلاليل ... رجل يرحِّب لي لفوه الرجاجيل

إلى دخلت البيت شفت المعاميل ... دلَّال بغداد من البنّ يملاه

قالت ونعم به ولا شك زَعَّال ... ولا قط يوم وافقن سايح البال

السد ما يهفي على كل رجَّال ... الَّا على اللي خافي الهرج يكماه

* * *

وقلت له: يا بنت هذا المصيطير ... توه على الدنيا وحب الغنادير

ماهوب ينشد عن كثير المخاسير ... ان كان تبغينه فحنا وصلناه

وقالت: نعم به ولا به عذاريب ... لا شك توه ماارتكئ للمواجيب

طماع ماله بالبنيِّ الرعابيب ... دور لنا غيره ترانا عديناه

وقلت: هذا القرزعي هج بابه ... رجلٍ بْكانه ولا يندري به

بالمشتري والبيع ما ينحكى به ... يا بنت هذا القرزعي لك عرضناه

تقول ونعم به يبيع الدباره ... لا شك ما زل يوم ما تجدد حواره

رجل نعرفه ما يحب الخساره ... اخاف يبلشني بتسريح معزاه

وقلت له: هذا (دحيم الدهانا) ... اللي كريم من خيار رفقانا

---

(١) المعاشيش: جمع معشاش: كناية عن الدكاكين، لأن أهلها يضعون فوقها المعاشيش في الصيف، إتقاء للشمس.