كتاب معجم أسر بريدة

الشريدة - سنة الجوع - ج: 11 - ص: 138

قال الذي ما قال زود ولا زور ... وقول بلا فعل هله يقمحون

أنا شهيد محمد هو ومنصور ... بدفع البلا كل الملا يشهدون

وأنا قصير محمد هو ومنصور ... جيرانهم بصحونهم يرثعون

صغار وكبار وزود هل الدور ... اللي بهن لحقوقهم يرسلون

لي نوخوا ما قالوا الباب مسكور ... الضيف ضيف الله ولا يزعلون

حران ذبح الضان وجنوب وظهور ... وزاد يكوم في كبار الصحون

إلَّا وسهلين وجزلين وظفور ... ودرب المراجل يضربونه بهون

من طلعة النجمة إلى شقة النور ... من مالهم لأعمالهم يجمعون

يا ما تلاقي من صحيح ومصفور ... وعجز وشيبان سواة الشنون

لي قلت: خَفوْا جا مع السوق طابور ... ناس تلاقي من بعيد يجون

أجواد لو عَليه خلاخيل وخصور ... عطية خفا ما نظرت بالعيون

الله ذكر من صغَّر النفس ماجور ... وأسعدهم بإيمانهم ينثرون

باعوا على الله ما هي بالهرج والشور ... يا الله عسى في بيعهم يربحون

اللي يبي الجنة وينزل مع الحور ... يفطن لعيلات هَلّهْ يستحون

أنا اطلب الله كل ما اقعد وابي أثور ... محمد ومنصور عسى يسلمون

وفهد وأبوه بنية الخير مذكور ... المال دون وجيههم يرخصون

و(يحيى) بغيباته للأمصار مشهور ... طيبه مع اللي للنضا يتبعون

بالبر والبلدان وبديرة الغور ... اللي هل العيرات له ياردون

وحمود وسليمان لي ركبوا الكور ... مروسين للفرَجْ يقطعون

إبراهيم وصالح ما بهم حكي وقصور ... وعلي وتال الغوش ماهمب دون

هذا الجهد مني إلى صرت مقهور ... العذر يا جيراننا فاعذروني

سلام مني عدد موج ببحور ... على النبي وأصحاب له يتبعون