كتاب معجم أسر بريدة

باب العين - العمار - ج: 15 - ص: 529

وبالرجال لي شاف اجناب ... يركض ويغلق الباب

دونه ودون الطيب حجاب ... ما يصبر للمخاسير

وبالرجال سحَّاب هدوم ... راعي كبر وراعي زوم

يكنس لي شاف اللزوم ... لي اقفي ما يداني الصفير

وبالرجال من كنه ذيب ... الله يأخذ وهو يجيب

لو حط الله له رقيب ... كان ان شويه كثير

وبالرجال نقال هرج ... ياكل لحمك لونك حرج

خذ من هرجه وحط بالخرج ... وانقل حذرك من الخنزير

وبالرجال فحول حريم ... ان زعلته جاله لطيم

هو يعده كالزعيم ... وهي تعده كالسفير

وبالرجال حاشي رغاي ... يرغي لي شاف الشراي

ما يصلح لك يا السراي ... دور لك غيره بعير

والرجال ابعاد سد ... لو يسقط به ضلفه بد

صبر ما كنه يشد ... لو فوقه حمل كبير

وبالرجال كبار بخوت ... راعي سمت وراعي سكوت

لي اقبل للمجلس يفوت ... والى هرج سيف بتير

وبالرجال ابعاد سدود ... راعي مد وراعي جود

والي زبنت ازبن بحيود ... يعطون الشور الشوير

وانحر صليبين الشور ... كان انك قرم ممرور

والا قنصت اقنص بصقور ... لا تقنص بالعصافير

والحريم منيَّهات ... بهن للجاهل شارات

فيهن نيران وجنات ... والاكثر شر وهدير

فيهن هنوف بلاجه ... ما تشوف الغضب بحجاجه

ولا هي عن بيته نهاجه ... ما والله عنه تسير

وفيهن هنوف مستوره ... تصبر لو انه مصخوره

دايم هرجتها مقصوره ... به تدبير وبه توفير