كتاب معجم أسر بريدة

باب الدال - الدخيل - ج: 6 - ص: 232

ما همني قولك ولا نيب محتار .. ولا همني كثر الهذي والحمية

ولا .. فخر زود على الناس معبار ... تبي تطير ومرجعك للوطية

أنا من أجوادٍ لهم صيت وأذكار ... حمايل ماشيف منهم قضية

أبوي محمد مهنته شبة النار ... لضيفه يقلط سفرته والصنية

وجدي من إرجال لهم قول وأشعار ... قبايلٍ تعرف، ولا هي خفية

والحمد لله والثنا النافع الضار ... اللي رفع فوق الخلايق نبيه

هو الأصيل وما تعداد محدار ... واللي سلك درب الصحابه هنيه

والله خلق آدم من طين فخار ... وحَوَّى خلقها من ضلوعه الزكية

وحذره ربك ترى ابليس غدار ... ومن الحسد حصل لنفسه أذية

عقب النعيم وجنة الخلد مدرار ... أهبط بدنيًا في عناها شقية

ودور على حوا يبي جنى الاثمار ... وعند الجبل عرفه لنفسه هدية

وعند المشاعر بينهم صار ما صار ... تم التعارف بالرضا والرضية

وذرية منهم تنامت بالأقطار ... عبر البحور أو بالوعر والوطية

ما بينهم فرق ولا فوقهم ثار ... ولابه فضيلٍ دون ذاك أو خويه

إلا بتقوى الله غفار الأوزار ... اللي ابتقواه البشر هووليه

كلَّه عبيد الله إصغار واكبار ... أعيال ابونا آدم وحوى سوية

وحنا على دين الرسالة والأبرار ... الدين واحد، والعقيدة نقية

وصلوا على محمد عدد سيل الأمطار ... اللي شرع للناس حج وضحية

ومما قال الشاع دخيِّل:

قالوا قصيمي قلت غيره فلا نيب ... نعم قصيمي رافع الراس للعال

مانيب من اللي يمسك الحبل للسيب ... أو يرخص الشيمة لا بوفلان بريال

أنا قصيمي وآل سعود المعازيب ... وداري بريدة ديرة الجد والخال

ديرة رجالٍ حاشت المجد والطيب ... يا عَل تسقيها المخاييل همَّال

دار النشاما ناطحين المواجيب ... اللي مراجلهم للأجيال ميثال