كتاب معجم أسر بريدة

العيد - سليمان العيد الشاعر - ج: 16 - ص: 444

بيت الرجال اليوم مع ضيقه الحيل ... عمله زمان فات ماحد يسوم

طلبت من عمي وحرصت بالحيل ... يوم ان بنت العم تجي رحوم

بحال الصغار تروف وتعدل الميل ... عادات صلب الجد يرفى الثلوم

خطبت حصه حيث فيها تنافيل ... العقل هو والدين هو اللي اروم

لا شك صك الباب من دون تعليل ... لو هو ذكر لي عذر والله ما الوم

لو هو اخذ رايه عطته التفاصيل ... قالت ولد عمي يحقق احلومي

ما احملها من طيبين الرجاجيل ... من جنس عمي جعل عمره يدوم

حنا جسد واحد ولا به تنافيل ... حقه يعرف القاعده والسلوم

نعده ذخر أن كبا الزند والحيل ... وله نبيع ارواحنا دون سوم

دوم بالجمعا تعز الرجاجيل ... والا التفرق مال بيدين فوم

ترى التفرق طينة ذابها السيل ... تمزعت بكل وادٍ تعوم

دمعي على الروس القواسي هماليل ... شيالة الكايد الي جا اللزوم

اللي بيوم الضيق يساقون بالكيل ... ومن لا يفي بالضيق يغشاه لوم

لا تامن الدنيا ترا عدلها ميل ... إن ضحكت لك يوم تبكيك يومي

والله من صنديد بنت له الحيل ... زرع بها غبن وحصد به همومي

وهذه حياة العبد قطع وتواصيل ... وهو مع المتياه الشلاه تومي

وصلاة ربي عد وبل المخائيل ... على النبي ما لاح صباح يوم

وقال سليمان بن عبد الله العيد بعد مجيء الملك عبد الله بن عبد العزيز من جهة حائل إلى بريدة في عام ١٤٢٧ هـ:

هذي بريدة ترفع الصوت عالي ... تبكي رجال الأمس واهل الحميا

تبكي وتعول اليوم وآشيب حالي ... وين الرعيل اللي بنى المجد فيا

انا امهم وهم أبرَّا العيال ... يا ليتهم حيين عندي اهنيا

بشكي عليهم حالي وما جرى لي ... واقول لهم كل تغير عليا