كتاب معجم أسر بريدة

ومن أسرة البليهي - الشيخ عبد العزيز بن محمد بن إبراهيم البليهي - ج: 2 - ص: 380

القصر لو هو ينطوي كان طويت ... شديت يوم أن القرايا جفتنا

لي جيت بقصور الحناكي تعفيت ... وشاورت أبو مطلق على سالفتنا

يا شيخ ما والله بالامثال زليت ... جيناك جوعى والظروف اجبرتنا

اهل الرخا ربعي يقولون ما جيت ... ولا عدهم يوم القواصي قصتنا

يا كثر هرج مكثرين التصاويت ... وعلومهم عبر الفضا واصلتنا

لي شوشت عوج المناخر تقصيت ... نقصى الايدين اللي طغت واحذفتنا

انا بتزويل المخاليق وريت ... اجسامهم وازوالهم هولتنا

تراي والله يا هل العرف ما اخطيت ... انا الحق الشرهه على طارفتنا

عظامنا بعظامهم واللحم ميت ... وان لِدْتْ لفروع القبايل شنتنا

مهازل الدنيا تهزل العفاريت ... دارت بنا دنيا الخطا وهزلتنا

يا ما كلت من روس قوم عناتيت ... وحنا تسوق اقدامنا قافيتنا

ما نيب ناجي تطلبن لو تتقيت ... تتكشف الاسرار لي دورتنا

احسابنا عند الولي ناصب البيت ... في رحمته والا السعاير شوتنا

ما غير اسليِّ خاطري يوم غنيت ... اضحك وبقعا بالحذا واطيتنا

وانا على البيبان يا بدر خليت ... اسايلك بالله وين اشجرتنا؟

ما غير نمشي في وصوف وتواهيت ... والناس بوصوف الخطا ضيعتنا

سمتِّ روحي في غثا الوقت تسميت ... بكيت يوم أن الحبال خنقتنا

خويت لي عذرا ومعاها تماديت ... لكنّ بشلان الشليل انفضتنا

اقفت تراعيني وانا اعذرت واقفيت ... له نيةٍ ترجع ولا وادعتنا

والله يا لولا اللي تحران بالبيت ... لشغلٍّ الرشاش في حاقنتنا

اللي تهل دموعها كل ما اقفيت ... لي سمعتن بالبيت جت ناطحتنا

افزع لنا يا بدر يا طيبِّ الصيت ... يا كثر وقفات الكريم بجهتنا

وقفت لي يوم انهزم كل خرتيت ... كل العلوم الطيبه واجهتنا

لا حانبت عوج الظهور المساويت ... ثنى بها الطيب ولا كلفتنا