كتاب موسوعة القبائل العربية

من شعر سبيع والسهول النبطي - مناحي بن معدل السهلي - ج: 6 - ص: 290

ياهل الركاب اللِّي تقدون بسهيل … أنا دليلتكم لسوق المباعه

أنا دليلتكم على وادي الغيل … يُشرى جلبكم ما بعد زل ساعه

أنا لقيت البن ياهل المعاميل … البن جاله في العويرض زراعه

عند ابن قبان يهيله بلا كيل … والظاهر أنه ما يكيله بصاعه

جماعة ابن شخيتل وافي القيل … اللِّي يحطون المراجل طماعه

قلته وأنا ماني براعي مواكيل … مير أعجبوني بالكرم والشجاعه

قلته وأنا من روس ربع مشاكيل … صبيان قحطان للمعادي مراعه

قال مبارك بن ناصر بن حمير الدوسري يمدح السهول:

اللِّي مهيضني على بدعي القيل … مراجل من فعل ربع مسماه

مثل الجمال اللِّي تصابر على الشيل … سهولٍ لى من وقف العلم لاقصاه

فعلٍ مثل شمس الضحى تجلي الليل … ما أحدٍ فعل فعلٍ فعلتوه شفناه

بدا بها شباب ضو المعاميل … عدم العيال اللِّي وساع نهاياه

فعلك يابو مشعان هيف المواحيل … ما أحد بدا به من وزا به وسواه

ذباحة لضيوفها قحم الحيل … سهولٍ على درب المراجل مضراه

سهولٍ على كسب النفايل قديمين … مع الصخا شجعان وقت المثاراه

أفعالهم وصلت ديار المناهيل … اللِّي مشى بالطيب للناس يلقاه

ما ينطح القالات كود الرجاجيل … من صكته صكات الأيام تنصاه

لى ركبن سود الليالي المقابيل … ذرب الرجال يعد من فعل يمناه

فعلٍ فعلته ودك إن له دواوين … يكتب على اللوحات من مَرّ يقراه