كتاب موسوعة القبائل العربية

بعض أشعاره وأخباره - الفرق بين الجيران - ج: 9 - ص: 210

أما على الشرطة يقدم شكيته … والا على القاضي يكذّب بأقاويله

أقاويل صدق أو كذب أو ربما … حرامٍ شكيا الجار لو طالت الطيله

وأوصيك لا تنزل على منزل العرب … محل الجرب بعدي ولو داره محيله

وبيت الخنا ما هوب ينظف من الخنا … ولو غسل بالصابون. . ويعاد تغسيله

فاحرص على تنظيف عرضك ولاحظه … لا تاطا الخطر رجليك وعيونك اتخيله

مع العلم لا حل القدر ضيّع البصر … لمن حلت الأقدار ما سرت الحيله

ولا شك تنظيفك لعرضك من الخنا … بريحك عند آخر زمانك واتاويله

وصلوا على سيد البشر عندما انتشر … وعداد ما هل المطر من هماليله

يقول حمد بن هادي المسردي القحطاني:

يقول اللي برسم القافيات … يصوغ القاف صوغ مجوهرات

إلى منه بغا نظم القصيد … فلا يختار غير الطيبات

تنقا من نظيفات اللحون … على كيفه من القاف كلمات

محاريف القوافي لو تعصت … أصخرها ولو هي عاصيات

تخيرت الكلام اللي يفيد … وجنبت العلوم التافهات

وأنا قاسيت شدات الزمان … وذقت أمرارها والحاليات

ومن قاسى على الدنيا شدايد … يفيد ويستفيد من الحياة

وأنا ماني بقول اني خبيرٍ … ولاني بدعي بمقولات

درست من المعرفة ما تيسر … وصرت أعرف علوم موجزات

وعشت من الحياة اللَّه واعلم … عن اللي من سنين العمر فات

عرفت أطوار نبات الرجال … وشفت أسرارها المتخالفات

وميزت الرفيع من الوضيع … وقلت الحق ولا علم الثبات

ترى في الناس من يجلي الهموم … عن المضيوم عند النايبات

يسد النوب من كل النواحي … ويركي للحمول الكايدات

عزيز النفس لو ماله قليل … ايدينه بالوفا مستاصلات

عزيز النفس لو ماله قليل … احباله للمكارم واردات

عزيز النفس لو ماله قليل … اشبور للمراجل طايلات